Kadungan sang pagpagwa sang alkalde sang Executive Order number 32 sa pagpasirado sang mga resorts sa apat ka mga kabarangayan sa syudad sang Bacolod sa adlaw sang kapiyestahan ni San Juan de Bautista sa Hunyo 24, nagpanawagan sang kooperasyon ang punong barangay sang Barangay Granada bangud isa lang man ini ka adlaw kag ini ang para man nga indi na magdugang sa pagsaka ang kaso sang COVID-19 sa syudad.
Sa interview sang Bombo Radyo Bacolod kay Punong Barangay Alfredo Talimudao, temporaryo nga magasirado ang mga kapehan kag mga resorts sa Barangay Granada kag Barangay Alangilan.
Nagapangayo siya nga kooperahan ang ginapatuman nga executive order sang alkalde.
Suno kay Talimudao, may yara man sang konsiderasyon nga ipatuman kaangay sa mga kasal nga nabook na nga daan, bangud exclusive man ini
Ini man magasirado ang mga restaurants.
Ginpahayag man sang Punong Barangay nga kaupod man nila sa pagpatuman sang executive order ang mga kapulisan sang Bacolod City Police Station 5, kag hugot nga ginamonitor sang mga ini ang mga resorts agud nga masiguro nga nakasirado.
Nagapadayon naman ang ila nga information dissemination agud nga mainform ang mga tawo angot sa executive order.
Nagpanugyan man ini sa mga pumuluyo sang Barangay Granada nga magsunod sa ginapatuman nga EO bangud para man ini sa kaayuhan sang tanan.
Nagpanawagan man ini nga kun may makita nga nagalapas, dapat man ipadangat sa barangay ukon sa kapulisan agud nga mahatagan sang nagakaigo nga tikang.
