Ginkompirmar sang punong barangay sang Barangay Mansilingan, Bacolod City nga nagpositibo siya sa COVID-19 kaupod ang iya 22 anyos nga anak nga lalaki nga nagatrabaho man sa syudad.
Suno kay Punong Barangay Rodolfo “Boy” Pico, nakabatyag siya sang sintomas sang balatian sang Miyerkules sang tinalikdan nga semana kaangay sang pagmala sang tutunlan kag hilanat gani nagpaidalom na ini sa swab testing sang Biyernes sa BAYS CENTER kaupod ang anak sini kag gilayon man nga nagpaidalom sa self-isolation samtang nagahulat sang resulta.
Kagab-i, naggwa ang resulta nga positibo sila sang anak sini sa balatian.
Sa karon, naka-isolate si Pico sa ila kwarto kag natalana naman nga ipaidalom sa swab test ang caregiver sang iya ginikanan, ang iya asawa kag duha ka mga helper sa ila balay.
Isaylo naman sa quarantine facility ang duha ka mga kabulig kun matapos na ang swab testing.
Samtang, ilockdown man ang Barangay Hall kag Barangay Health Center sang Mansilingan sang isa ka semana agud madisinfect.
Maga-assign man ini sang Barangay Kagawad nga mangin caretaker sang Barangay samtang nagapaidalom ini sa home quarantine tubtub nga magnegatibo sa virus.
