Hugot nga ginpanginwala sang punong barangay sang Barangay Mansilingan, ciudad sang Bacolod nga may yara sang anomaliya sa pagpanagtag sang Social Amelioration Program (SAP) sa ila barangay sang tinalikdan nga bulan sang Abril.
Sa interview sang Bombo Radyo Bacolod kay Punong Barangay Rodolfo “ Boy” Pico, ginpanindugan sini nga ginhimo niya lang ang nagadakapat.
Suno kay Pico, ginhimo lang sini ang nagakadapat kag santo sa pagsulundan sang Department of Social Welfare and Development (DSWD) sa panagtag sang SAP.
Suno diri, ang mga benepisyaryo ang nag-agi sa proseso antes maqualify kag indi lamang ini ang nagpili sa mga qualified beneficiaries bangud ginhingyo sini ang Department of Social Services Division (DSSD) nga padal-an sang DSWD personnel agud magscreening sa mga beneficiaries.
Ginlantaw man sini nga may lakip nga pamulitika ang pagpasaka sa iya sang kaso.
Suno diri, sabton niya lang ang ginareklamo batok sa iya apang nagapati ini nga wala siya sang anomaliya nga ginhimo.
Wala man ini sang ideya kun sin-o ang nagreklamo sa iya kag hugot man sini nga ginpanginwala nga may yara sang connivance nga natabo.
Suno sa barangay official, atubangon na lamang sini sa prosecutor’s office ang ginpasaka sa iya nga kaso.
