Nagdepensa ang punong barangay sang Mansilingan sa alegasyon sang mga miyembro sang Metro Bacolod Mansilingan Drivers Association (MBMDA) nga wala pa sila nahatagan sang ayuda kag ginatug-anan lang sang barangay.
Sa interview sang Bombo Radyo kay Punong Barangay Rodolfo ‘Boy’ Pico, ginahakot pa lang halin sa bodega sang ciudad ang ihatag nga foodpacks.
Suno kay Pico, naulihi ang Barangay Mansilingan bangud gin-una sang Department of Social Services and Development (DSSD) ang numbered barangays kag naulihi ang named barangays.
Suno sa barangay official, ginkuhaan nila sang mga ngalan ang mga miyembro sang transport group kag ginpaagi sa association agud masiguro nga taga-Mansilingan ang mahatagan nga driver.
Nagpasalig man ini nga kun indi mahingagaw panghatag subong nga adlaw, buas ihatag ang ayuda bangud narepack naman ini kag handa na ipanagtag.
