Kampante ang legal counsel sang Central Negros Electric Cooperative (CENECO) nga mabakod ang kaso nga ginpasaka batok sa punong barangay, barangay secretary kag barangay treasurer sang Singcang Airport, ciudad sang Bacolod bangud sa ginaalegar illegal nga pag-tap sang kuryente para sa barangay hall sa sulod sang lima ka tuig.
Sa interview sang Bombo Radyo kay Atty. Marcus Vaflor, indi na niya madetalye ang merito sang kaso batok kanday Punong Barangay Rosinie Distrito bangud yara na ini sa Office of the Ombudsman.
Suno kay Vaflor, mabakod ang kaso bangud ginresearch ini sang mga abugado agud indi magfile sang kaso nga 50-50 ukon mahuyang ang ebidensya.
Bangud sini, naghatag sang unsolicited advice si Vaflor sa punong barangay nga sabton lang ang reklamo batok sa ila.
Sa interview sang Bombo Radyo kay Punong Barangay Rosinie Distrito, wala sang kamatuoran ang mga alegasyon batok sa ila.
Sa karon, wala pa sini nabaton ang kopya sang complaint apang kun ara na gid man, ila lang ini nga pagasabton.
Suno kay Distrito, bisan sin-o ang sarang nga makafile sang reklamo sa Office of the Ombudsman apang dapat nga may yara sang ebidensya.
Aminado si Distrito nga nagpadala sang sulat ang CENECO sadto kag ila na ini nasabat apang wala man sila ginpatawag para sa settlement.
Panindugan sang punong barangay, ginahalungan nila ang kwarta sang barangay kag wala ini ginagamit sa personal nga interes.
