Gin-athag sang punong barangay sang Barangay Tangub, Bacolod City nga wala ini nagpangayo sang donasyon para sa Covid-19 patients sa ila barangay.
Ini ang kasunod sang litrato nga naglapta sa social media nga nagpangayo sang donasyon ang barangay nagikan sa mga benepisyaryo sang Social Amelioration Program cash grant kahapon.
Sa interview sang Bombo Radyo Bacolod kay Punong Barangay Noli Villarosa, gin-athag sini nga nagpangayo sang bulig sang anak sang residente nga nagtaliwan bangud sa cardiac arrest bangud wala sang inugbayad sa lungon sang nagtaliwan nga amay.
Naghingyo ini sa iya kun mahimo makabulig sa ila ang mga nakabaton sang SAP apang wala ini nagpasalig bangud wala man siya sang kasiguruhan kun makabulig ang mga beneficiaries.
Gani nagbutang ini sang dropbox kag nagpangayo sa mga beneficiaries sang donasyon para sa pamilya sang namatyan kag indi para sa iya ukon sa Covid-19 patients sang Barangay Tangub.
Ginpahayag man ni Villarosa nga ang paghatag sang donasyon ang boluntaryo kag wala sila nagpamilit.
Agud mapamatud-an nga ang unod sang drop box ang para sa pamilya sang namatyan ginbuksan ni Villarosa ang box kag ginpakita sa Bombo news team kun sa diin gilayon man nga gin-isip sang anak sang napatay.
Ini ang ginalakipan sang tag-20 pesos, 50 pesos, 100 pesos kag may yara man sang sinsilyohon.
Nagdangat sa P5,200 ang unod sang dropbox nga ginbutang ni Punong Barangay Noli Villarosa para sa donasyon sa pagbulig sa anak sang nagtaliwan sini nga residente agud mabayaran ang lungon sang amay nga gin-utang sa punerarya.
Suno kay Villarosa, ginpahayag sini ang kuarta nga natipon ang gin-isip kag ginpadul-ong gilayon sa punerarya.
Suno diri, masobra pa kuntani sa P5,200 ang matipon nga kuarta para ibulig sa pagbayad sang lungon apang namalisyahan ini kag madamo na ang nagapamangkot angot diri gani gin-untat niya lamang.
Ginpasalamatan naman ni Darlene Tolentino nga bata sang napatay ang mga pumuluyo nga nagbulig sa ila agud makatipon sang kantidad kag mabayaran ang ila utang sa punerarya.
