Nagfile ang Central Negros Electric Cooperative sang kaso administratibo batok sa punong barangay, barangay secretary kag barangay treasurer sang Singcang Airport, ciudad sang Bacolod bangud sa ginaalegar illegal nga pag-tap sang kuryente para sa barangay hall sa sulod sang lima ka tuig.
Suno kay Ma. Luisa Parroco, pinuno sang Coop Promotions Section sang CENECO, ginpasaka ang reklamo nga violation sang Anti-Graft and Corrupt Practices Act batok kanday Punong Barangay Rosinie Distrito kag duha ka iban pa sa Office of the Ombudsman for the Visayas sang Marso 15.
Suno kay Parroco, wala nakabayad sang electric bill ang Barangay Singcang Airport gani nautdan ini sang supply halos lima na ka tuig ang nakaligad.
Lipod sa ihibalo sang CENECO, nag-attach ang barangay hall sa isa ka balay nga nautdan man sang kuryente sang bulan sang Nobyembre bangud wala nakabayad sang bill nga indi magnubo P200, 000.
Sang wala na sang kuryente sa amo nga balay, nadiskubrehan sang CENECO nga direkta na gid nga nagtap sang supply sa poste ang barangay hall sang Singcang.
Suno kay Parroco, nagpadulong ang tagbalay sa CENECO agud isettle ang iya balayran apang wala na ini ginpahanugutan.
Ang kabug-usan naman nga bill sang Singcang nga nalibre sa sulod sang pila ka tuig ang ginabanta nga indi magnubo sa P1 million.
Suno kay Parroco, gin-una file ang kaso sa Ombudsman bangud public servant ang respondents.
Ang kaso kriminal nga atubangon nanday Distrito amo ang violation sang Anti-Pilferage Act of 1994 nga nagapina sa mga jumper ukon nagapangawat sang kuryente.
