Kampante ang Punong Barangay sa Brgy 1, Bacolod City nga husto ang ila proseso sa paghatag sang Bagong Pilipinas Presidential Scholars sa idalom sang Bawat Barangay Makikinabang Program (BBM), kag deserving ang mga nahatagan.
Nahibaluan nga nagbatun sang tig-P20,000 ang lima ka mga napilian nga Presidential Assistance Scholars.
Sa interview sang Bombo Radyo Bacolod kay Punong Barangay Cesar Rellos, aminado ini nga malip-ot lang ang ginhatag nga tion sa pagsumiter sang pangalan, gani gilayon sila nga nagpost sa facebook page sang ila Barangay.
Nahibaluan nga kalakip sa qualifications sang mahimo mapasakop sa scholarship program gikan sa National Government amo ang mga 4th year graduating students sa kolehiyo gikan sa mga imol nga pamilya, at risk nga madrop out bangod sa kakulangan pinansyal, kag pamilya nga wala pagid sang may nakagradwar sa kolehiyo.
Ang Barangay ang sarang man makadugang sang criteria, apang dapat ini ang dokumentado.
Suno kay Rellos, ginpanawagan nila ang tanan nga may bata nga manug-gradwar sa kolehiyo, kag ini ang ginsala tubtob nga 13 ka mga qualified applicants na lamang ang nabilin.
Ginpalos man nila sa listahan ang mga may himata nga Barangay officials, agud wala sang conflict of interest.
Bangod lunsay kwalipikado kag para kay Rellos mga deserving man ang 13 ka estudyante, ginpapili na lamang nila ang mga ini kun magsugot nga iraffle na lamang ang ila pangalan.
Suno sa Punong Barangay, inkaso wala nagpasugot ang mga estudyante, sila ang hatagan sang examination.
Bangod tanan ang lunsay nagsugot sa raffle, sila mismo ang ginpabunot agud madula man ang pagduda nga may-ara sang biases sa pagpili.
Suno kay Rellos, dako nga bulig ang P20,000 partikular na sa mga dalagko ang tuition fees agud ini ang mabayaran antes ang graduation.
Ginapakamaayo man sini nga sa mga estudyante mismo derekta nga magakadto ang kwarta.
