Ginahulat pa ang opsiyal nga pag-anunsyar sa resulta sang ginpatigayon nga convention sang Team Asenso sa ciudad sang Bacolod, kahapon.
Ang convention ang ginpatigayon agud nga pilian kun sin-o ang ibutang sang grupo para sa duha ka nabilin nga pwesto sa pagkakonsehal.
Nagpapili para sa posisyon amo sanday former councilor Homer Bais, Brgy. 26 Punong Barangay Jhun Marby Orola, Rico Ferdinand Villafuerte, Brgy. 40 Punong Barangay Elmer Villanueva, Brgy. 34 Punong Barangay Teodoro Yulo kag Brgy. Vista Alegre Punong Barangay Jose Maria Leandro Norberto De Leon.
21,117 lamang gikan sa masobra 26,000 ka mga voters ang nagboto.
Sa initial result, nagpanguna sanday Yulo nga may yara sang 10,910 ka boto kag De Leon nga may 9,440.
Nagasunod naman amo sanday Bais nga may 8,809; Orola nga may 7,276; Villanueva nga may 1,999 kag Villafuerte nga may 1,303.
Sa interview sang Bombo Radyo kay Punong Barangay Paul Anieve sang Brgy Mandalagan, nag-umpisa alas- 8:00 sang aga kahapon ang convention kag nagtapos ala- 1:00 sang hapon, samtang ang counting sang boto naman ang natapos alas- 4:00 sang hapon.
Suno diri, inisyal nga resulta pa lamang ang ginpaggwa kag ang official result ang iga-anunsyar ni Bacolod City Mayor Alfredo ‘Albee’ Benitez posible sa masunod nga inadlaw.
