Ginbatak na ang pagdeklarar bilang ultra risk areas sa Purok Bulak, Barangay Mandalagan kag sa East Homes Subdivision sa Barangay Estefania kahapon.
Nahibaluan nga may yara sang pamilya si Negros Occidental Patient No. 2 sa nasambit nga mga lugar kun sa diin naka-close contact sini.
Sa interview sang Bombo Radyo Bacolod kay Vice Mayor El Cid Familiaran, chairman sang inter-agency task force against coronavirus, ginkumpirmar sini nga gin-lift na nila ang pagbutang sa ultra risk areas sa duha ka mga lugar sa ciudad matapos nga nagnegatibo sa balatian ang mga pamilya ni Patient No. 2 sang probinsya.
Nahihaluan nga si Patient No.2 ang isa ka 43-anyos nga driver nagikan sa Pavia, Iloilo kag residente sang Barangay Nato, La Castellana.
Suno kay Familiaran, nagapabilin naman karon nga naka-seal off ang Purok Bayanihan sa Barangay Banago kag ang Purok Sabes sa Barangay Villamonte.
Nahibaluan nga si Bacolod Patient No. 8 ang taga-Purok Sabes apang nagtaliwan na samtang si Bacolod Patient No. 9 naman nga taga-Purok Bayanihan ang nadischarged na sa ospital kag naka-isolate lamang karon sa isa ka lugar.
