11 naman ka bag-o nga kaso sang COVID-19 ang dugang nga narekord sa Purok Mahimulaton, Barangay Banago, ciudad sang Bacolod nga ginalakipan sang Purok Chairman kag pamilya sini.
Suno kay Punong Barangay Ricky Mijares, nakakas na sadto ang lockdown sa Purok Mahimulaton apang ang bag-o nga mga kaso ang nagikan naman sa pihak nga bahin sang purok.
Kadungan sini, ginswab ang opisyal apang nauna nga naggwa ang resulta sang Purok Chairman nga positibo.
Gilayon nga gindala sa Quarantine Facility ang Purok chairman kasubong man ang pamilya nga kaupod sa balay kag ginpaidalum man sa swab test.
Naggwa naman gilayon ang resulta nga nagpositibo ang 10 sa mga ini gani 11 ang kabug-usan nga nagpositibo kaupod ang Purok Chairman.
Ginkordon naman ang balay sang mga ini kaupod pa ang 7 ka mga balay nga yara sa palibot.
Ginsunod man ang protocol nga 30 meter radius nagikan sa puluy-an sang nagpositibo gani ginpaidalum sa Home Quarantine ang mga pumuluyo sa pito ka balay kag may mga naka-assign naman nga magabantay diri gud nga maseguro nga wala sang makagwa.
Padayun naman nga ginasuplayan sang barangay sang pagkaon ang mga residente sa nakalockdown nga lugar nga ginabanta ginalakipan sang 30 ka persona.
