30 ka mga balay ang sakop sang lockdown nga ginpatuman sa Purok Masanag 1, Barangay 26, ciudad sang Bacolod matapos nga may residente nga nagpositibo sa Covid-19.
Ang nasambit nga lugar ang ulihi nga nagdugang sa mga ginlockdown matapos ang Purok Seaside, Barangay Tangub, kag isa naman ka balay sa Purok Paghida-et, Barangay 29.
Suno kay Barangay Tanod Jason Avagon, indi makalab-ot sa 100 ang indibidwal nga apektado sang lockdown bangud kalabanan diri ang nagadayon sa lugar.
Ginakabalak-an naman ni Bacolod City Vice Mayor El Cid Familiaran kun asta san-o ang masarangan sang Bacolod City Government nga paghatag sang relief packs sa mga nakalockdown nga lugar ilabi na sa Purok Mahimulaton, Barangay Banago kun sa diin nakalockdown ang kabug-usan nga Purok nga nagalab-ot sa 600 ka pamilya kag ang dugang pa nga lima ka pamalay sa Purok Riverside sa nasambit nga Barangay.
Nagaproblema naman sa karun sa tubig ang mga yara sa nakalockdown nga lugar.
Magahatag naman subong nga adlaw ang ciudad sang ilimnon nga tubig sa Purok Mahimulaton kag magapatigayon man sang dugang nga contact tracing.
May tsansa naman nga bug-os nga Barangay ang igalockdown kun magapadayun nga maglapta ang virus.
Ginapangabay nalang sini nga indi matabo sa Bacolod ang kaangay sang nadangatan sang Cebu.
Pagabantayan naman kun ano ang mangin desisyon sang national IATF sa Bacolod bangod sa pagdamo sang kaso.
