Ginkumpirmar sang Punong Barangay sa Barangay 16, Bacolod City nga maestorya na ang Purok President sang Purok King Fisher A, nga natrap sa nagakasunog nga balay kaina sang kaagahon.
Ang Purok President nga si Alejandro Tiad ang sa karun yara sa Intensive Care Unit (ICU) sang Riverside Medical Center.
Sa interview sang Bombo Radyo Bacolod kay Punong Barangay Jason Ligaya, ginklaro sang asawa ni sang Purok President nga magkaupod sila sang iya bana kag apat ka kabataan gikan sa 2nd floor sang ila balay sang matabo ang sunog.
Dulungan man kuntani ang mga ini nga magapanaog apang nagbalik ang iya bana agud kuhaon ang mga dokumento sang ila kabataan.
Mapalaron nga nakagwa ang mag-iloy apang ang Purok President ang ginalantaw nga nahulog sa hagdan kag wala makabangon matapos makakapyot sang live wire.
Ini ang narescue matapos mabatian sang mga fire personnel nga may nagapangayo sang tabang.
Gin-athag man sini nga indi third degree burn ang naagom nga paso ni Tiad, kundi second degree burn lamang gikan sa liog panaog sa lawas.
Magapatigayon man sang Council Meeting ang Barangay agud maplastar ang ila mabulig sa mga biktima kag sa pagpabulong kay Tiad.
Nagapanawagan man si Ligaya nga mabuligan ang Purok Presidente nga madamo naman sang nabuligan, karun nga ini naman ang nagakinahanglan sang bulig.
