Ginbululigan sang mga pumuluyo sa Purok King Fisher A, Barangay 16, Bacolod City ang temporaryo nga pagkay-o sang balay sang Purok President nga napatay sa sunog sang Agosto 1 bangod diri gihapon ihaya ang biktima.
Madumduman nga si Purok President Alejandre Tiad, ang nakagwa na kuntani sa ila nagakasunog nga balay, apang ini ang nagbalik para kuhaon ang mga dokumento sang ila mga kabataan sa ikaduha nga panalgan sang balay.
Apang ini ang nakakapyot sa live wire kag nadagdag sa idalom, tubtob nga ini ang narescue sang mga bombero.
Ang Purok President ang nakaangkon sang second degree burn kag ginsulod sa Intensive Care Unit (ICU) sang Riverside Medical Center, apang ginbawian sang kabuhi sang Domingo.
Sa interview sang Bombo Radyo Bacolod kay Analida Tiad, asawa sang biktima, apisar nga naga-ayo na ang paso sang iya bana, ulihi nalang sang mahibaluan nga ini ang nakaangkon sang komplikasyon sa iya internal organs.
Nakasugtan naman sang mga kabataan sang biktima nga ini ang ihaya gihapon sa ila nga nasunog nga balay, gani ini ang ginbululigan nga bisan paano liwat matukod.
Suno kay Analida, tubtob sa karun daw indi pa sini mabatun ang pagkadula sang iya nga bana.
Dugang pa sini nga nakabakal naman sila sang mga kinahanglan sa eskwelahan sang ila mga kabataan, kag tanan ini ang natupok.
Suno kay Analida, nagabulig man ang mga katrabaho sini sa Philippine Amusement and Gaming Corporation (PAGCOR) kalakip na sa hospital bill, apang ginakulang gihapon bangod sa tatlo ka adlaw nga pagtinir sa ICU nagadangat na sa P400,000 ang ila nga bill.
