Patay ang isa ka purok president matapos ginluthang sang pito ka armado nga persona sa Sitio Mahusay, Barangay Cambayobo, Calatrava.
Sa interview sang Bombo Radyo Bacolod kay Police Captain Jesus Alba, deputy chief of police sang Calatrava Municipal Police Station, ang biktima nga ginkilala nga si Joemarie Nabisis, 41 anyos ang nagatrabaho sa ila nga humayan sang hinali na lamang ini nga ginpalapitan sang pito ka armado nga mga persona kag gilayon nga ginluthang.
Ini ang nagresulta naman sa gilayon nga kamatayon ni Nabisis.
Sa pagsugilanon sa witness sa insidente, ginpahayag naman sini sa kapulisan nga matapos ang pagpatay sa biktima gilayon na lamang naghalin ang mga suspetsado kag wala naman sang iban pa nga ginhalitan.
Aminado si Alba nga Communist Terrorist Group (CTG) infested area ang nasambitan nga lugar.
Suno diri, may nagalibot nga espekulasyon pinaagi text messages nga nagapahayag nga mga makawala nga grupo ang may kahimuan sa krimen, apang santo sa ila pagtsekyar, wala naman sang announcement gikan sa mga social media sites sang mga New People’s Army (NPA) nga sila ang may kahimuan sang pagpatay.
Narecover sang mga ini ang basyo sang bala sang M16 rifle kag .45 cal. Pistol.
Suno kay Alba, wala man sang may nahibaluan ang pamilya kag mga pumuluyo sa Barangay nga may kaaway ang biktima ilabi na nga halos kadam-an sa ila nga lugar ang ila naman nga mga himata.
