Gilayon nga nagsabat ang purok president sang Purok Ilang-Ilang, Barangay Poblacion, Bago City nga si Emelita Palmares sa reklamo nga ginpadala sa Bombo Radyo nga wala gid siya nagbulig sa mga pumuluyo sa Purok Ilang-Ilang sang naglabay ang Bagyo Goring sang Agusto 28.
Ini ang kasunod sang sulat sang isa ka residente sa purok nga si Lalaine Villanueva nga wala sila ginrescue sang nagluntad ang baha, sa baylo, ginhambalan sila nga masakay lang sa tricycle.
Suno kay Palmares, tingob sila kuntani sang iya grupo nga magasimba sang Agusto 28 sang aga bangud magafile sila sang Certificate of Candidacy sang una nga adlaw sang paglabay sang Bagyo Goring apang siya nalang isa ang nakasimba bangud nagaulan.
Paggwa sini sa simbahan, nagdiretso ini sa Bago City Coliseum bangud nagbaha na kag didto gindala ang evacuees.
Alas-3:00 pa lang sang kaagahon suno sa iya, nagsugod na pangrescue ang mga barangay officials.
Ginhagad naman ini ni Punong Barangay Sergio Piansay nga malibot kag mabakal sang tinapay bangud igadul-ong pa ini sa mga evacuees, kaupod ang arroz caldo.
Alas-8:00 sang aga, ginhagad ni Palmares ang iban nga barangay kagawad nga masulod sa Purok Ilang-Ilang bangud ginapatihan sini nga may tubig na sa Zone 2 gani nagdala sila sang service vehicle sang Barangay Poblacion.
Gin-engganyo ni Palmares ang mga pumuluyo nga nagaistar sa flood prone area nga mag-evacuate na bangud may rescue vehicle, apang may iban nga residente nga wala naghimos agud magbakwit.
Ginpauna naman sang mga bana ang ila mga asawa bangud sila ang magapabilin kag magapanilag sa lebel sang tubig bangud may yara man sila sang tricycle.
Suno kay Palmares, pila ka zona ang ginkadtuan nila agud nga irescue kag nagadul-ong man sang pagkaon sa mga evacuees, samtang ang iban nga taga-Purok Ilang-Ilang ang nag-amat-amat naman padulong sa coliseum.
Agusto 29 sang aga, nag-evacuate man sanday Palmares sa Barangay Lag-asan bangud nalab-ot sang baha ang ila balay, apang iya ginpanginwala nga naggamit ini sang vehicle sang city government sa pag-evacuate.
Suno diri, mahimo nga ginpagwa sang mga nagpirma sa sulat nga wala siya sa Purok Ilang-Ilang bangud sang nagsulod sila sa ila purok sang Agusto 29, naka-evacuate na ini sang kaagahon.
Nag-upod man kaina kay Palmares ang pila ka mga residente nga nagpirma man sa sulat nga ginpadala sa Bombo Radyo kag ila ginpanindugan nga sila ang gintiplang lang.
Suno kay Emmanuel Tico, ginpapirma siya ni Lalaine Villanueva sa papel kun sa diin ginpalista sa iya ang tanan nga miyembro sang iya pamilya bangud hatagan sila sang bugas nga tag-lima ka kilo.
Suno kay Tico, gin-into lang siya bangud ginbutang niya man sa listahan ang ngalan sang iya kabataan kag iya misis apang gindala gali ang sulat bilang reklamo sa Bombo Radyo.
Suno sa iya, lima ka ngalan ang iya ginlista sa paglaom nga makabaton sang 25 kilos sang bugas.
Suno naman kay Shirley Alvarez, nagpirma ini sa sulat bangud may kaayuhan nga batunon.
Suno sa nagpapirma sa ila, ang sulat ang nagikan sa opisina sang gobernador.
Bangud sini, nag-upod gid ini kay Palmares sa pagpadulong sa Bombo Radyo agud nga makasabat.
Ang sulat nga ginpapirmahan sa ila sang Lunes ang wala sang unod nga text kundi blangko lang kag ginpahayag ni Villanueva nga may ayuda nga pagabatunon.
