Iga-evaluate sang Provincial Veterinary Office (PVO) kun kinahanglan nila nga magdugang sang tawo kasunod sang paglapta pa sang African Swine Fever (ASF) sa Mindanao.
Sa interview sang Bombo Radyo Bacolod kay Provincial Veterinarian Dr. Renante Decena, lantawon nila kun kinahanglan nga dugangan ang personnel sang Negros Occidental Provincial African Swine Fever (ASF) Task Force kasunod sini.
Nahibaluan nga kaina lang sang aga sang gindeklarar na sang banwa sang Don Marcelino sa Davao Occidental ang state of calamity matapos nga nagpositibo sa ASF ang samples nga ginkuha sa kapin isa ka libo nga patay nga baboy.
Sa karun, naka-heightened alert na ang mga airport personnel sa Bacolod-Silay Airport agud nga indi makasulod sa Negros Occidental ang mga pork kag pork products nga gikan sa Davao Occidental.
Madumduman nga sang nagligad nga November 2019, ginpasar sang Sangguniang Panlungsod ang ASF Prevention Ordinance of Negros Occidental nga nagadumili sa pagsulod sa probinsiya sang live pig, boar semen, pork, kag pork products, lakip na ang food items nga may pork kag gikan ukon ginproceso sa Luzon kag mga pungsod nga apektado sang ASF.
Suno kay Dr. Decena, mangin sakop naman sa ordinansa ang mga lugar sa Pilipinas nga gintumod sang gobyerno nga apektado na sang ASF.
Sa karun hugot man nga ginabantayan sang ASF, nga indi makasulot sa Negros Occidental ang shipment sang mga live porks nga nagagikan sa Cebu nga nagaagi sa Dapitan, kag Dumaguete nagalabay diri sa Bacolod antes mag-deresto sa Panay.
