BACOLOD CITY-Nasubuan ang chairman sang Philippine Weightlifting Association (PWA) sa mga hibubun-ot nga ginpaguwa ni Olympian kag Asian Games gold medalist Hidilyn Diaz batok sa iya kag mga sports officials sang pungsod.
Sa exclusive interview sang Bombo Radyo Bacolod kay PWA chairman Monico Puentevella, ginpahayag sini nga nasubuan siya sa nangin aktuwasyon ni Diaz kag nagapati ini nga ginsulsulan lang ini kasunod sang iya sulat nga gin-address kay Philippine Sports Commission (PSC) Chairman William “Butch” Ramirez tinalikdan nga Setyembre 21, 2018.
Suno kay Puentevella, may mga tawo sa likod ni Diaz nga mga taga-Cebu nga nagasulsol diri nga may handom man nga buslan siya sa pwesto.
Gintumod sini nga ang nasambit nga mga tawo ang madugay na niya nga ginpangsipa bangud sang sala sang mga ini sa PWA nga indi na niya luyag ibuyagyag.
Dugang pa sini nga ang malapit karun nga nagasulsol kay Diaz ang isa ka fugitive sa Dubai.
Ginpanginwala ni Puentevella ang mga alegasyon ni Diaz sa iya sulat kalakip na diri ang bweltada sa pahayag sang Olympian nga wala sang programa para sa ila.
Suno diri kun wala sang programa ang PWA paano siya nakalab-ot sa London kag Rio Olympics kag nagka-gold sa Asian Games sa Indonesia.
Aminado si Puentevella nga karun nga milyonaryo na si Diaz madamo ang magapalapit diri apang nasubuan lang ini nga nagdangat ini sa nasambit nga tikang nga kun panumdumon 12-anyos pa lang ini sang iya nakilala kag gintuytuyan kun sa diin man siya karun.
Nasubuan man si Puentevella nga nagdesisyon si Diaz nga islan ang iya 15-anyos na nga coach.
Ginpanindugan man sini nga nagdaog siya sa eleksyon tinalikdan nga 2016 kag sa 2020 naman ang masunod nga piniliay.
Madumduman nga sa sulat ni Diaz, ginpabutyag sini ang iya kasubo nga sila mismo nga mga atleta ang nagaantos sa wala niya nauyunan nga sistema sa PWA sa diin si Puentevella ang presidente.
Ginakabig ni Diaz nga depressing ang paggamit sang isa ka sports leader sa weightlifting nga wala sang promotion kag expansion sang sports, wala sang strategic plan, wala sang long-term program para sa mga atleta kag wala sang integridad.
Suno kay Diaz, nagatuga lang sang kapahamakan sa weightlifting si Puentevella sa baylo nga itib-ong niya ang paghugpong kag paghili-usa.
Ginduso man sang Olympian nga kuntani boluntaryo nga himuon ni Puentevella kun ano ang husto niya nga himuon.
Magluwas diri, ginaduso man ni Diaz nga kuntani naglabay sa husto nga election process ang anay alkalde kun luyag gid man sini nga mangin presidente sang PWA.
Dismayado man ang Asian Games gold medalist nga matapos ang iya kadalag-an sa 2016 Olympic Games, may pila ka mga persona nga naggamit sa weightlifting para sa ila bentaha kag indi sa bentaha sang sports kag sang mga atleta.
Suno diri, dapat nga mauntat na ini nga sistema bangud sila ang mga biktima.
Kasunod sini, ginkumpirmar ni Puentevella nga ginsapol na ni Ramirez si Diaz kag ginlaygayan kag diri sini gin-ako nga nagpirma lang siya nasambit nga sulat.
Samtang, suno kay Puentevella luyag niya nga pamatian si Diaz bangud nagapati ini nga ginagamit lang ini sang mga tawo sa iya likod nga luyag magbalik sa posisyon sa PWA.
