BACOLOD CITY – Nahatagan sang katumanan ang pila katuig na nga handom sang isa ka person with disability (PWD) nga makaangkon sang wheelchair matapos ini mapilian bilang benepisyaryo sa Bombo Medico 2017.
Temprano pa nga nag-abot sa Bacolod Arts and Youth Sports (BAYS) Center sa ciudad sang Bacolod si Jessie Alintuson sang Silay City, Negros Occidental agud magpalantaw sa mga volunteer doctors nga gin-imbetar sang Bombo Radyo Bacolod kag subong man, agud personal nga batunon ang wheelchair nga gikan sa sponsors.
Emosyonal nga nagpasalamat sa Bombo Radyo si Alintuson bangud wala sini ginalauman nga mahatagan pa sang katumnan ang lima katuig na sini nga handum nga mag-angkon sang wheelchair matapos ini ang gin-utdan sang batiis bangud sa komplikasyon sa masakit sini nga diabetes.
Malipayon si Alintuson bangud makatrabaho kag makabulig na ini sa mga ulobrahon sa sulod sang panimalay.
Samtang, bilang pagpasalamat sa ginbaton nga bugay, ang baston nga iya nangin kabulig sang pila katuig ang ginhatag na lamang sini bilang donasyon sa Bombo Medico 2017 kag may mabulig man nga iban.
