Ipresentar ni Bacolod City Mayor Alfredo “Albee” Benitez sa Senado ang pag-implementar sang QR coded nga Senior Citizen kag Persons with Disability (PWD) card kasubong man business permit, bilang pagtapna sa pagpameke.
Sa interview sang Bombo Radyo Bacolod kay Bacolod City Legal Officer Atty. Romero Carlos Ting Jr. ginalantaw sini nga magaserbe nga resource person ang alkalde.
Suno diri, nasugid sadto ni Benitez kay Senator Win Gatchalian kag nabatian man ni Senator Raffy Tulfo ang nahanungod sa paglapnag sang peke nga Senior Citizens kag PWD ID sa ciudad.
Sumugod sang napatuman ang QR coded IDs kasubong man QR coded business permit, sila ang wala na nakabatun sang report sang pagpameke.
May-ara man sang nagapangapameke sang booklet, agud magamit ang discount bisan sa mga groceries.
Ang Bacolod City ang naga-isahanon nga local government unit (LGU) nga nagahatag sang QR coded IDs kag business permit.
Apang aminado man si Ting nga may mga tion nga wala ginabatun sang mga negosyante ang senior citizen kag PWD IDs bangod wala sang QR code.
Paathag ni Ting, nga wala sang QR code ang IDs gikan sa iban nga LGUs gani ini ang dapat ikonsiderar kag batunon.
Sa karun nagdangat na sa 7,758 ang nakabatun sang PWD ID samtang 7,433 naman ang senior citizen ID.
