Magatukod sang Quad Committee ang House of Representative agud hugpungon na lamang ang committee hearings nga may palarehas nga mga resource persons.
Sa interview sang Bombo Radyo Bacolod kay House Deputy Minority Leader kag Alliance of Concerned Teachers (ACT) Partylist Representative France Castro, luyag nila nga ihugpong ang ginapatigayon nga hearing sang Committee on Justice and Human Rights, Committee on Good Government and Public Accountability, Committee on Public Order and Dangerous Drugs kag Committee on Games and Amusement.
Suno diri, sa masami may mga resource person nga indi makatambong sa mga hearings bangod sila ang ginapasa-pasa sa lainlain nga komitiba kaangay lamang sang mga ahensya sang Philippine National Police, Philippine Amusement and Gaming Corporation, Commission on Human Rights (CHR) kag iban pa.
Halimbawa sini sa Congressional hearing angot sa illegal nga droga kun sa diin gina-imbetahan si Senator Ronald ‘Bato’ Dela Rosa kag Michael Yang; sa Congressional hearing sang Philippine Offshore Gaming Operators (POGO), involved naman si Michael Yang kag former President Rodrigo Duterte; samtang sa Congressional hearing angot sa Extra Judicial Killings, yara naman si Duterte kag Senator Dela Rosa.
Magluwas sa ila may iban pa nga palarehas lamang nga involved sa nagkalainlain nga issues nga ginatalakay sa Kongreso.
Ang Quad Committee ukon Super Committee ang pamunuan naman ni Surigao del Norte 2nd District Representative Robert Ace Barbers.
Aminado naman si Castro nga nakadepende kay Senator Dela Rosa kun ini ang magatambong sa hearing bangod may-ara sang interparliamentary courtesy, apang bangod ordinaryo nga pumuluyo na lamang si Duterte, ini ang obligado nga magtambong sa hearing agud masabat ang mga polisa sini sa war on drugs kasubong man ang pagsuporta sa POGOs.
Nagapinsar naman sila nga magpatigayon sang on-site hearing sa Davao, apang wala pa maplastar kun paano ang implementasyon.
Panindugan ni Castro nga indi na bag-o ang Quad Committee bangod madugay naman nga ginapatigayon ang mga Joint Committee Hearings sa mga related bills ukon resolutions.
