Gin-inagurahan na kahapon ang ginpatukod nga quarantine center sa syudad sang San Carlos, Negros Occidental.
Sa interview sang Bombo Radyo Bacolod kay San Carlos City Mayor Renato Gustilo, madamo sang nagabalik nga mga Locally Stranded Individuals (LSI) sa syudad kag wala sang butangan rason nga nagpatindog sila sang quarantine center.
Kapin P10 million ang gingasto sang syudad sa pagpatindog sang phase 1 sang quarantine center nga ginalakipan sang anom ka bunkhouse samtang ang phase 2 ang padayon pa nga ginaubra kag may balor P16 million.
Apat diri ang para sa mga nag-abot nga LSI kag duha para sa mga nagpositibo sa COVID-19 nga asymptomatic samtang ang mga symptomatic naman ang igabutang sa provincial healing center sa banwa sang EB Magalona.
Ang tagsa ka bunkhouse suno sa alkalde ang makaakomodar sang 14 ka mga LSIs.
Ini ang iga-facilitate sang mga personnel nagikan sa San Carlos City Health Office.
Maga-augment man sang mga doctor nagikan sa ospital sang syudad kag butangan sang police ang quarantine center.
May yara man sang mabantay nga personnel sang Disaster Risk Reduction and Management Office (DRMMO) kag may yara man sang personnel nagikan sa Environment Office nga magapabilin sang katinlo sang pasilidad.
Ginpahayag man ni Gustilo nga may yara sila sang sugaton nga 64 ka mga LSI sa Tabuelan port kag ini ang first batch nga magaoccupy sang quarantine facility.
Patapuson naman sang quarantine period ang mga nakaquarantine na sa eskwelahan kag igadisinfect ini para maturnover na sa Department of Education (DepEd).
Samtang, may yara man sila sang ginbutang sa border control sa syudad kun sa diin dapat nga mapakita sang mga travel documents ang mga mapadulong sa San Carlos City kag ginatsekyar man sang CHO ang body temperature kag ginapatuman man ang health protocols.
