Sa masunod pa nga tuig mangin fully operational ang quarantine/isolation facility nga nagabalor P25 million nga ginpatindog sang Department of Public Works and Highways sa Barangay Alijis, ciudad sang Bacolod kag ginturn-over sa city government sang Oktubre 30.
Sa interview sang Bombo Radyo kay Bacolod City Councilor Renecito Novero, chairman sang quarantine centers action team, mahimo na magamit ang quarantine facility sa Barangay Alijis apang wala sang aircon bangud wala pa natakdan sang transformer ang pasilidad.
Suno diri, ang kuryente ang gin-angot sa City Agriculture’s Office agud nga mapasiga ang suga sa quarantine facility.
Ginalantaw sini nga matakdan na sang transformer ang ila pasilidad sa katapusan sang bulan.
Suno diri, lain ang proseso sa pagbakal sang transformer bangud sa idalom sang kontrata, sa tion nga matapos na ang turnover sang pasilidad, ang syudad na ang masabat sang kuryente kag tubig.
Ang pagbakal sang transformer ang magaagi sa proseso sa idalom sang Republic 9184 ukon “Government Procurement Reform Act kag ginabanta tatlo ka bulan antes matapos ang proseso.
Ginpahayag man ni Novero nga nahimuan na sang Central Negros Electric Cooperative (CENECO) sang survey ang pagtakod sang transformer kag sa tion nga matapos na ang procurement process, ihatag sang syudad sa ila agud nga matakod.
