![](https://img.bomboradyo.com/bacolod/2019/11/Radio-broadcaster-sa-Dumaguete-ginpatay-sang-riding-in-tandem-suspects-1.jpg)
Gilayon nga ginmandu ni Presidente Rodrigo Duterte ang maid-id nga imbestigasyon may kaangtanan sa pagpatay sa radio broadcaster sa Dumaguete City, Negros Oriental, Huwebes sang aga.
Sa interview sang Bombo Radyo Bacolod kay Police Major Jesus Misajon, deputy chief sang Dumaguete City Police Station, riding-in-tandem suspects ang nagpatay kay Dindo Generoso sa Barangay Piapi, alas-7:30 sang aga.
Ang 67-anyos nga si Generoso ang nagalabay sa Hibbard Avenue sakay sa brown nga Hyundai Elantra kag pakadto na kuntani sa iya radio program sang ini ang gintiro sang mga suspetsado sang makapila ka beses nga gintunaan sang iya nga kamatayon.
Nakuha sang mga pulis sa sulod sang iya salakyan ang walo ka slug.
Si Generoso ang ikaduha na nga broadcaster sa Dumaguete City nga ginpatay sa sulod sang isa ka tuig.
Nangin longtime block timer man ini sang local politicians kag spokesman ni Dumaguete City Mayor Felipe Antonio Remollo.
Suno kay Misajon, ginatumod pa ang motibo sa krimen apang wala ginadula nga may kaangtanan ini sa trabaho sang biktima.
Sa press conference ni presidential spokesperson Salvador Panelo kaina sang udto, ginpahayag sini nga ginmanduan ni Duterte ang mga otoridad nga magpatigayon sang maid-id nga imbestigasyon sa krimen.
Ginkondenar man sang Malakanyang ang pagpatay sa broadcaster kag nagalaom ini nga mapasabat sa layi ang mga responsable.