Radio reporter sa Dumaguete City, ginpatay sang riding-in-tandem suspects kagab-i

Patay ang isa ka radio reporter matapos ginluthang sa Barangay Daro, Dumaguete City, Negros Oriental, kagab-i.

Suno sa impormasyon sang otoridad, ginkilala ang biktima kay Cornelio Pepino ukon mas kilala nga Rex Cornelio, 48 anyos, isa ka reporter kag announcer sa DYMD Energy FM.

Nahibaluan nga nagasakay sa motorsiklo si Pepino angkas ang asawa sini sang may nagdungan sa ila kag gilayon lang nga gintiro sang duha ka mga suspetsado sakay ang motorsiklo sa Villa Amada, North Road, alas 8:30 sang gab-i.

Gindala sa Silliman University Medical Center ang biktima apang gindeklarar nga dead on arrival.

Wala naman nahibaluan ang kondisyon sang asawa sang biktima.

Sa karun, padayon pa ang imbestigasyon sang mga kapulisan tuhoy sa insidente.