Indi pa matumod sang chairperson sang committee on market and slaughterhouse sa Sangguniang Panlungsod sang Bacolod kun san-o patigayunon ang raffle agud madeterminar kun sa diin mapwesto ang mga vendors sa annex building sang Libertad Public Market.
Suno kay City Councilor Celia Flor, sa pagsinapol sang Local Market Committee subong nga semana, nagdesisyon ang mga ini nga iisol anay ang raffle bangud luyag sini nga mahitso ang masterlist kag sampat sa listahan man sang mga vendors.
Mas luyag pa gid ni Flor nga magluwas sa masterlist, may mapa pa ang Local Market Committee agud matumod kun ang vendor ang nagapwesto gid man sa naka-indicate sa mapa kag masiguro nga husto ang yara sa masterlist, bangud amo man ini ang ginhimo sa plaza kag sa downtown area.
Suno diri, may mga kahigayunan nga ginabaligya man sang vendors ang ila nga pwesto.
Suno sa konsehal, ginapatigayon ang revalidation agud nga maminimize ang personal nga interest sang mga vendors kag malakip man ang ambulant vendors sa listahan.
Suno kay Flor, madamo nga ambulant vendors nga wala nalakip sa listahan.
Ila naman ginpanginwala nga ginbaligya nila sa iban ang ila nga pwesto.
Aminado nga konsehal nga naplastar na ang iban nga lugar nga ginapwestuhan sang mga vendors kag Libertad Public Market nalang ang problemado bangud mahitso na ang Burgos kag Central Market.
