Nagpatigayon sang raid ang US immigration agents sa Newark, New Jersey worksite sang Huwebes, Enero 23 oras sa Amerika, sa tunga sang crackdown sang Trump administration sa illegal immigrants sa Amerika.
Sa isa ka statement, ginpahayag ni Newark Mayor Ras Baraka, napaslawan ang Immigration and Customs Enforcement (ICE) agents nga makapresentar sang warrant kadungan sang ila pagpriso sang mga indi dokyumentado nga residente kag mga pumuluyo sa ginlunsyar nga raid sa isa ka business establishment nga Ocean Seafood depot sa Newark, sagwa sang New York City.
Isa sa mga gindetain ang isa ka US military veteran nga nakaeksperyensyensya sang indignity matapos nga kwestyunon kun lehitimo ang iya nga military documentation.
Sa isa ka statement, ginpahayag sang spokesperson sang Immigration and Customs Enforcement nga ila ginaimbestigahan ang nasambit nga insidente.
Apang suno kay Mayor Baraka, ginlapas sang ginlunsyar nga raid ang mga kinamatarong sang mga pumuluyo sa idalom sang US Constitution.
Samtang, ginreport naman ni White House spokesperson Karolin Leavitt nga yara sa 538 ka mga tawo ang naaresto sang Trump administration sang Hwebes nga ginlaragway bilang illegal immigrant criminals.
Suno diri, kaupod sa mga nadakpan ang mga miyembro sang Venezuelan prison gang kag mga indibidwal nga convicted sa sex crimes.
