Light to moderate lamang ang mga pag-ulan nga tayuyon nga nabatyagan sa Negros Oriental dala sang Bagyo Basyang.
Sa interview sang Bombo Radyo Bacolod kay Negros Oriental Provincial Disaster Risk Reduction and Management Officer Adrian Sedillo, ang kaangay nga tiyempo ang nabatyagan humalin pa kahapon, nga wala nagasanto sa ginpagwa nga warning sang Social Weather Station Philippine Atmospheric, Geophysical and Astronomical Services Administration (PAGASA).
Sa PAGASA warning kasubong man sa alert warning nga ginpadala sang National Disaster Risk Reduction and Management Council (NDRRMC), red rainfall warning ang mabatyagan sa probinsya.
Ang red rainfall warning ang nagakahulugan sang mabaskog nga pag-ulan.
Suno kay Sedillo, ginamonitor nila ang sitwasyon sa palibot sang probinsya kag ang resulta sang monitoring ang ginapadala nila sa Local PAGASA.
Ini agud matsekyar ang discrepancy sa weather forecast kag sa matuod nga sitwasyon.
Ginakahangawa sini nga kun mag padayun nga tuman ka layo ang weather forecast sang PAGASA, maga-abot ang tion nga indi na magpati ang mga pumuluyo sa warning kag advisories.
Dugang pa sini nga ang mga tikang sang provincial government kag sa mga ehansya sang gobyerno ang masami nakabasi sa ginapagwa nga forecast sang PAGASA.
Pasalig naman ni Sedillo nga preparado ang probinsya kag may mga local governm ent naman nga nakapatigayon sang preemptive evacuation.
Ginapanugyan man sini nga mareview ang hazard map sa Bulkan Kanlaon bangod sa posibilidad nga ini ang nagbag-o na.
Suno diri, sadto wala gid gina-ekspektar nga makabig flood prone area ang Canlaon City, apang ini ang ginbag-o sang Bagyo TINO.
Sa karun, bilog nga Negros Oriental ang makonsiderar na nga hazard prone sa baha.
