Gindeklarar na sang state weather bureau Philippine Atmospheric, Geophysical and Astronomical Services Administration (PAGASA) ang pagsugod sang tig-ululan diri sa pungsod.
Suno sa PAGASA, ang madamo nga pag-ulan nga naobserbaran sang nagliligad nga mga inadlaw sa nasidlangan nga bahin sang Luzon kag Visayas bangud sa pagluntad sang lapta-lapta nga pag-ulan, masami nga pagpangilat, ang paglabay ni Typhoon Aghon kag ang Southwest Monsoon.
Suno diri, ang mataas nga tiyansa sang La Nina conditions nga magadevelop sa mga bulan sang Hulyo, Agosto kag Setyembre ang magapasaka pa sang tiyansa sang above-normal rainfall conditions sa pila ka bahin sang pungsod ilabi na sa katapusan sang tuig.
Apang ginpahayag sang PAGASA nga posible nga may mga breaks sa pag-ulan nga maga-extend sang pila ka adlaw ukon semana.
Ginaabisuhan sini ang tanan nga concerned agencies nga maghimo sang precautionary measures batok sa adverse impacts sang maulanon nga tiyempo, Habagat kag ginapaabot nga La Nina kaangay sang pagbaha kag mga landslides.
