Ginsugata si Presidential Candidate Vice President Leni Robredo sang libo-libo nga mga taga-suporta sa iya nga paglibot sa Negros Occidental sang Biyernes, Marso 11 kag gin-endorso man ini sang mga lokal nga opisyal sa probinsya.
Sa San Carlos City nga una sa walo ka lugar nga ginpadulungan ni Robredo, ang gobernador sang Negros Occidental Eugenio Jose “Bong” Lacson ang mismo nga nagpakilala sa bise presidente.
Suno kay Lacson, maalam ang kandidato, sinsero, mabinuligon kag masaligan.
Madumduman nga una na nga gin-endorso ni Lacson ang kandidatura sa pagkapangulo ni Robredo.
Gintapos ni Robredo ang iya nga paglibot sa probinsya sa Paglaum Sports Stadium sa syudad sang Bacolod kun sa diin 86,000 ang mga Negrense ang nagpakita sang ila nga pagpalangga kag pagsuporta para sa kandidato.
Ini na ang pinakadako nga rally ni Robredo humalin sang siya ang nag-umpisa sa pagkampanya sang Pebrero.
Nagserbe naman nga bituon sang paglaom si Robredo para sa mga nagtambong sa rally kun sa diin siya ang ginsugata sang makusog nga hinugyaw gikan sa lunsay dagat sang pink kag mga “star of hope” nga ginakaptan sang mga supporters.
Singgitan man sang mga ini sa rally ang “Hindi kami bayad!”.
