Madinalag-on nga napatigayon kahapon ang rally para sa ika-75th anniversary sang International Human Rights Day.
Kapin alas-2:30 kahapon sang hapon, nagparada ang mga human rights advocates sa palibot sang Bacolod Public Plaza tubtob sa nagtipon sa atubang sang halandumon tower agud isinggitan ang ila mga panawagan sa gobyerno.
Sa interview sang Bombo Radyo Bacolod kay Bishop Virgilio Amihan sang Iglesia Filipina Independiente, apisar nga tuigan nga ginaselebrar ang komemorasyon sa United Nation (UN) declaration sang International Human Rights karun lamang ini ginpangunahan sang One Negros Ecumenical Council (ONE-C) nga ginabug-usan sang tanan nga mga simbahan sa Negros Island.
Ginapasalamat ni Amihan nga pinaagi sini napalab-ot nila ang mga ginasinggitan sang simbahan nga nagapakig-angot sa kahimtangan sang Diyos kag katawhan.
Suno diri, ang simbahan ang padayun nga nagapanawagan nga respetugon ang integridad ukon tawhanon nga kinamatarong sang mga tinuga sang Diyos.
Magluwas sa mga kaparian nag-upod man sa rally ang pila ka mga youth organization kasubong man ang pila ka transport group.
Sa interview sang Bombo Radyo Bacolod kay Raoul Manuel, representative sang Kabataan Partylist, ginapakamaayo sang mga ini nga nadayun ang aktibidad nga nagapakita sang sentimiyento sang nagkalainlain nga sektor.
Panindugan sang mga ini nga dapat iduso ang gobyerno nga ila maseguro ang tawhanon nga kinamatarong sang tanan.
Kalakip na diri ang kinamatarong sa maayo nga palangabuhian, sa mas mataas nga sweldo, sa duta sang mga mangunguma kasubong man ang wala nagakaigo nga red tagging sa mga organisasyon nga nagapalab-ot lamang sang ila tingog sa gobyerno.
Suno kay Manuel, ginpatigayon nila ang rally bangod nakita sang mga ini nga bisan bag-o ang administrasyon nga ginalaragway pa nga “Bagong Pilipinas”, nagapabilin gihapon ang threats kag harrasments kag ginatawag nga terorista ang mga organisasyon nga may-ara lamang sang ginapakigbato.
Panawagan sang mga ini nga luyag na nila ini nga ma-untat.
Sa pihak nga bahin, suportado man sang mga ini ang pagpatigayon sang peace talks sa tunga sang gobyerno sang Pilipinas kag National Democratic Front (NDF), agud madiskusyunan ang ugat nga nagresulta sa armado nga pagpakigbato.
Paathag ni Manuel nga ang kada tawo may kinamatarong, gani dapat tanan man ang magbuligay agud ini ang mapakigbato.
