Nangin madinalag-on ang ginpatigayon nga rally protesta sang pila ka mga transport group sa ciudad sang Bacolod kahapon sang hapon kasunod sang ila nga pagkadisgusto sa Public Utility Vehicle modernization program.
Sa interview sang Bombo Radyo Bacolod kay Bacolod Alliance of Commuters, Operators and Drivers Inc. (BACOD) president Rudy Catedral, ginakabig sini nga madinalag-on ang rally protesta nga ila ginpatigayon bangud gin-updan ini sang masobra 300 ka mga drivers nga nagabiyahe sang nagkalain-lain nga routa sa ciudad sang Bacolod.
Suno kay Catedral ang ginpatigayon nila nga protesta ang may kaangtanan sa December 31 nga deadline sang consolidation sang mga traditional jeepneys bilang kabahin sang pagpatuman sang modernization program.
Nagapanindugan man si Catedral nga indi sila magsunod sa deadline kasubong man sang consolidation process bangud madamo na sa ila nga mga kaupdanan ang nagpaconsolidate apang nagkalapierde na.
Ginpahayag man sini nga may nabaton man sila nga impormasyon nga may operator sa ciudad sang Bacolod nga ginpasakaan pa kaso nga 38 counts sang carnapping apisar nga nag-invest na sang dako nga kantidad para sa modernization program.
Bangud sini, ginakabig niya nga palpak ang Modernization Program sang gobyerno.
