Gin-athag sang deputy head sang Bacolod Traffic Authority Office nga ginpasugtan ang mga nagrally-protesta nga drivers kag operators sang traditional jeepneys nga magpatigayon sang ila aktibidad sa sulod sang Bacolod Public Plaza apang dapat nagpahibalo ang mga ini tatlo ka adlaw antes ang aktibidad santo sa layi.
Sa interview sang Bombo Radyo Bacolod kay Jose Antonio “Jojo” Robello, may yara sang nagluntad nga komosyon sa tunga sang BTAO kag mga nagrally matapos nga ginsaway ang mga ini bangud apisar nga nagsaylo matuod sa Bacolod Public Plaza apang ang mga ini ang nagplastar sa arko kag nag-occupy sang isa ka lane sang dalan nga nagtuga sang trapiko.
Suno kay Robello, nakaestorya sang mga nagrally-protesta si Bacolod City Vice Mayor El Cid Familiaran nga acting mayor sa karun, nga nag-athag nga mahimo sang mga ini magpatigayon sang nasambit nga aktibidad sa sulod sang Bacolod City Public Plaza nga amo man ang ginpahayag sang city administrator sang gin-estorya sang BTAO.
Indi man nangin maayo ang tenor sang tingog sang mga nagarally apang makaligad ang duha ka oras naathagan man ang mga ini kag nagsaylo sa sulod sang public plaza.
Samtang, ginpahayag man ni Robello nga kun magrally ang mga ini indi dapat magtuga sang huol ilabi na sa dalagan sang trapiko.
Ini bangud luyag sang transport group nga mag-untat man sa pagbiyahe ang iban.
Suno kay Robello, nawitness sini mismo nga kun may makita ang mga ini nga nagabiyahe, ginasinggitan sang mga ini nga mag-untat sa biyahe.
Suno sa deputy head sang BTAO, preparahan man nila kun magapatigayon liwat sang rally-protesta kag magahimo sang adjustments.
Panindugan sini,nga indi nila pahanugutan ang pagpatigayon sang rally-protesta nga nagatuga sang huol sa publiko.
