Ginbuyagyag ni Ramil Madriaga nga gina-alegar ginmanduan siya sang pamilya ni Duterte nga magbulig sa pagrecover sang mga nakumpiskar nga kargamento nga natukiban nagaunod sang bilyon-bilyon nga balor sang shabu.
Sa hearing sang House Committee on Justice, ginbasa ni Madriaga ang 49 pages nga supplemental affidavit kun sa diin detalyado niya nga ginplastar ang mga alegasyon batok sa bise presidente kag sa pamilya sini.
Suno kay Madriaga, ginmanduan siya ni anay presidente Rodrigo Duterte nga buligan si Manases Carpio sa wala pa niya nahibaluan sadto nga tion kun ano ang himuon.
Sa ulihi, iya nahibaluan nga ang amo nga transakyon ang may kaangtanan sa kumpiskado nga “construction equipment” naggikan sa Bureau of Customs.
Sang personal niya nga ginkadtuan ang Bureau of Customs makaligad ang pila ka adlaw, natukiban niya nga ang ginatumod nga “construction equipment” amo ang mga magnetic lifters nga gina-alegar naga-unod sang dalagko nga balor sang shabu.
Dugang pa diri, gin-abisohan siya sang isa ka abogado nga babayi nga mabudlay ang pagpagwa sang nasambit nga kargamento bangud ini ang ginakabig nga “hot item”.
Bilang pamatuod sa iya mga alegasyon, ginpresentar ni Madriaga sa justice panel ang ebidensya sang ila nga koneksiyon, nalakip ang mga litrato, screenshot sang video call, kag mga email.
Sa iya nga testimonya, gin-ako man ni Madriaga nga siya ang anay taga-suporta sang pamilya Duterte kag nangin kabahin sang grupo nga Initiative for Social Justice, Innovation, Progress Pilipinas ukon ISIP, nga nagasuporta sa ila nga kampanya.
Samtang naga-istorya si Madriaga sang iya inagyan sa mga gina-alegar ginapangsugo sang pamilya Duterte sa iya, nangin emosyunal ini kag naghibi.
Sa karon, wala pa sang opisyal nga pahayag gikan sa mga ginpangalanan nga mga personalidad may kaangtanan sa mga alegasyon.
