Nagnubo ang kaso sang pagpanghimulos sa probinsiya sang Negros Occidental sini nga tuig kun ikumparar sang 2018.
Ini suno kay Police Master Executive Master Sergeant Helen Lapiseros, chief clerk sang Women and Children Protection Desk (WCPD) sang Negros Occidental Police Provincial Police Office (NOPPO).
Santo sa datos, nagligad nga Hulyo tubtob Setyembre sang 2018 may yara sang 33 ka rape cases sa bug-os nga probinsiya.
Samtang may yara naman sang 30 cases sa pareho nga period sini nga 2019.
Suno kay Lapiseros, may yara man sang mga adbokasiya kag programa ang NOPPO agud mapahagan-hagan ang kaso sang rape sa probinsiya.
Nahibaluan nga may yara karun sang mando ang NOPPO director Police Colonel Romeo Baleros sa WCPD nga dapat makalibot ang mga ini sa probinsiya ilabi na sa mga nabukid nga mga banwa kag ciudad agud magpalapta sang impormasyon para sa pagtapna sang kaso.
Ini bangud suno kay Lapiseros, kadalabanan sang rape cases ang nagakatabo sa mga nabukid nga lugar kag masami pa nga maghimata ang biktima kag suspetsado ukon ang incest rape.
Samtang nagapahanumdom naman si Police Capt. Ramel Robles, Deputy Chief of Police sang Silay City Police Station sa mga ginikanan nga dapat bantayan sang husto ang ila mga kabataan kag indi gid dapat maghatag sang kumpyansa bangud kun kaisa mismo himata lamang ukon tupad balay ang makabiktima sa ila kabataan.
Suno naman kay Police Staff Master Sergeant Suzayne Ann Ligada sang WCPD sang Cadiz City Police Station, kadamuan naman sang biktima sang pagpahimulos sa ila nagligad nga tuig ang mga menor de-edad kag mga person’s with disability (PWD) nga amo gid ang vulnerable sa rape.
