Padayon ang imbestigasyon sang Bacolod City Fire Station sa gintunaan sang sunog nga nagluntad sa brgy 17, Bacolod City, Negros Occidental, pasado alas- 8:00 sang gab-i, kagab-i.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, nag-umpisa ang sunog sa balay sang isa ka kagawad nga si Rey Mirador.
Nagsaka sa second alarm ang status kun sa diin nagdangat sa P281,750 ang balor sang kahalitan.
15 tanan ka balay ang apektado sa sunog, walo ang totally damaged kag pito ang partially damaged apang ginalantaw nga madugangan pa ang numero.
Samtang, suno sa mga pumuluyo, may isa ka persona nga naga-board sa balay nga nagsindi sang itom nga kandila sa iya kwarto kag gilayon lang naglakat.
Ginsirad-an sini ang kwarto antes nga naglakat.
Pahayag ni Masip, ila pa lantawon kun may business permit ang boarding house nga nasunog.
Samtang santo naman sa alegasyon sang isa ka residente nga si Fe nga isa man sa nasunugan, gin-alegar sini nga si Jimmy nga ginpahayag ginpa-istar ni Barangay Kagawad Rey Mirador sa iya boarding house ang naghungod sang sunog.
Suno sa alegasyon ni Fe Surtan, nga santo man sa ginsugid sang iban nga boarders, si Jimmy ang nagsindi sang itom nga kandila bangud wala ini ginpahulam ni Mirador sang kwarta bangud nga napatay ang bata sini.
Suno diri, sang ginsindihan sang nasambit nga persona ang kandila sa kwarto sini ginlock niya ini kag nagwa kag naghambal pa nga masunog na ang nasambit nga balay.
Nagpanawagan man si Fe sang bulig bangud bisan isa nga panapton wala gid sila sang nasalbar.
Sa pihak nga bahin, padayon ang pag-assess sang Department of Social-Services & Development (DSSD) sa mga nasunogan sa Brgy 17, Bacolod City, agud mahatagan sang financial assistance.
Sa interview sang Bombo Radyo Bacolod kay Dr Richelle Verdeprado Mangga, pinuno sang DSSD- Bacolod, naga-assist ang DSSD, Bureau of Fire Protection (BFP), Amity Volunteer Fire Brigade, Philippine Red Cross – Bacolod City Chapter, kag Disaster Risk Reduction and Management Office (DRRMO) sa mga biktima nga temporaryo nagatinir sa Brgy Hall.
Sa karun 57 ka mga indibidwal ang narekord nga naapektohan apang ini ang mahimo nga madugangan pa samtang padayon ang ila assessment.
Suno diri, nahatagan na sang hot meals kag kag non food items ang mga biktima.
15 ang damaged nga mga balay, kun sa diin magabaton sang P15,000 ang may totally damaged nga balay, P10,000 ang may partially damaged nga balay samtang ang renters naman ang makabaton sang P5,000 tubtob sa P7,000.
Pahayag ni Mangga, mapasa lang sang requirements ang mga apektado sang sunog agud mahatagan sang assistance, nga suno diri ila man tinguhaan nga mabuligan ang mga pumuluyo nga makaprocess sang mga kinahanglan nga dokumento.
