Gin-athag sang civil military officer sang 79th Infantry Battalion, Philippine Army nga indi mistaken identity ang rason sa pagluthang sang riding in tandem suspects sa isa ka suldado, apang pagkabangag sang mga ini sa paggamit sang illegal nga druga ang nagduso sa duha nga himuon ang krimen.
Nagluntad ang shooting incident sa Sitio Takas, Brgy. Palampas, San Carlos City, Negros Occidental kahapon.
Ang biktima ang ginkilala nga si Alfort Tito, 40-anyos, residente sang Barangay Bato, Sagay samtang ang mga suspetsado ang ginkilala nga sanday Jobert Gimarangan Salazar, 31 anyos, kag Alfie Raganas, 42 anyos, lunsay mga residente sang banwa sang Calatrava.
Sa interview sang Bombo Radyo Bacolod kay 1st Lt. Dan Carlo Samoza, civil military officer sang 79th Infantry Battalion, off duty na si Tito kag nagabyahe sakay sa motorsiklo para magbakal sang iya bulong.
Samtang nagasunod naman ang duha ka suspek sa likod sini, apang bangod lang sa pag-overtake sang duha ka bahin, didto na kag ginluthang sang suspek si Tito.
Nag-angkon sang pilas sa paa kag tiyan si Tito nga gindala sa malapit nga ospital kag sa karun yara na sa estable nga kondisyon.
Nadakpan naman sanday Salazar kag Raganas paagi sa hot pursuit operation.
Nakumpiskar sa duha ang 45 calibre, apat ka magazine, 24 ka bala, holster, granada, KG9 gun, 15 ka sachet sang suspected shabu kag isa ka sachet sang marijuana nga nagabalor sang P1,106,527.
Suno kay Samoza, ang duha ka suspek ang nagtrending man sadto sa pagpost sa social media sang video nga naga-usar sang druga.
