Ginpahayag sang Chairman sang National Transport Group nga Manibela nga “trip” lamang ang pagpatigayon nila sang nationwide transport strike, nga ginpaanggid sini sa ginahimo sang gobyerno nga nagatripping lamang.
Sa interview sang Bombo Radyo Bacolod kay Manibela chairman Mar Valbuena, diskarte sang mga abusado nga excise tax lamang sa kerosene kag liquified petroleum gas (LPG) ang ginsuspender kag wala gintandog ang sa gasolina kag diesel.
Ini bangod dyutay lamang ang nagagamit sang kerosene, samtang dugay naman maubos ang isa ka tangke sang LPG.
Suno diri, indi nila luyag madula ang excise tax sa gasolina kag diesel bangod indi nila luyag madulaan sang makurakot nga kwarta.
Pahayag ni Valbuena nga nadulaan sang pulos ang ila mga nakaligad nga protesta kag mga apelasyon, sa baylo sila ang nakapuyan lamang kag ginpalaom lang ang mga pumuluyo.
Bangod sini, sila ang nagapanawagan sang tatlo ka adlaw nga transport strike sumugod bwas, indi na bilang panawagan, kundi bilang tripping na lamang.
Nagapati ini nga isa sa mga nagapamalabag sa pagdula sang excise tax sa gasolina kag diesel si Finance Secretary Ralph Recto, bangod ini ang sakon sa taripa, kag wala sang pagtamod sa transport sector.
Panindugan ni Valbuena nga bandaid solution lamang ang rollback sa presyo sang gatong, bangod apisar sa P23 nga pagnubo sa presyo sang diesel, masobra isa ka gatos gihapon ang kada litro.
Suno diri, ang mga desisyon sang gobyerno ang pasakit kag pabudlay sa mga pumuluyo.
Gani panawagan nila nga updan sang tanan nga transport sector ang 3-day transport strike.
