Padayon pa nga ginatumod sang kapulisan kun paano nakuryente ang isa ka menor de edad sa atubang sang Bacolod City Government Center, Barangay Villamonte, Bacolod City kagab-i nga gintunaan sang iya gilayon nga kamatayon.
Una diri, nabatian ang pagsigabong sa lugar kag nakita nalang nga nagahigdaon ang biktima.
Ang biktima kag ang duha sini ka mga kaupod ang lunsay mga menor de edad.
Yara sila sa 2nd floor sang establishimento sa atubang sang BCG kag ginalantaw nga nakakapot sa main electrical wire.// Nasunog naman ang panapton sang biktima kag ang insidente ang nagtuga sang brownout sa lugar.
Sa interview sang Bombo Radyo kay Bacolod City Police Office (BCPO) spokesperson P/Lt. Col. Ariel Pico, ginpahayag sini nga nagapadayon pa ang ila imbestigasyon kun ngaa nagsaka sa babaw sang establisyemento ang amo nga grupo kag kun paano ini nakuryente.
Santo sa pagpangusisa sang kapulisan, masami nagapalaboy-laboy ang biktima sa lugar kag gina-alegar nga kabahin sang rugby boys.
Sa karon suno kay Pico, wala pa sang medical report angot sa kamatayon sang menor de edad.
