Ginpatpat sang Vice President kag Chief Operating Officer sang Negros Electric and Power Corporation (NEPC) ang systems loss sa bill sang kuryente nga isa sa mga ginabayaran sang mga konsumidor.
Sa interview sang Bombo Radyo Bacolod kay Engineer Joe-Mel Zaporteza, ang systems loss ang kapin 10 percent lamang sang monthly bill kag ini ang gina-compute depende sa generation charges kag ang sa latest yara ini sa P1.00 per kilowatt hour.
Gin-athag man ni Zaporteza nga ang system loss charge sa monthly electric bill sang mga konsumidor ang ginabayad sang Negros Power sa generators kag transmission service provider kag wala ini nagakadto sa Negros Power.
Dugang pa sini, ara man ang technical loss ukon ang kuryente nga nagakadula samtang nagaagi sa mga wires padulong sa mga households.
Samtang isa man sa system loss amo ang non-technical ukon ang mga illegal connections kag mga naga-connect nga wala sang electric meter.// Ginpahayag man sini nga agud nga maproteksyunan ang mga konsumidor ang Negros Power ang nagapatigayon sang mga operasyon batok sa mga kawatan sang kuryente.
Suno kay Zaporteza, ginatinguhaan sang Negros Power nga mapabilin sa bare minimum ang system loss nga ginabayaran sang mga konsumidor apang gin-athag sini nga indi na ini ma-zero bangud nga sa tion nga maglabay ang kuryente sa transmission lines may nagakadula nga kuryente ukon ginatawag nga technical loss.
Madumduman nga sa State of the Nation Address (SONA) sang presidente sang July 27, nagdemanda ini nga dulaon ang system loss nga indi dapat ginabayaran sang mga konsumidor.
