Ginpatpat sang opisyal sang Negros Electric and Power Corporation (NEPC) ang rasun kun ngaa nagsaka sang P0.94 ang rate sang kuryente para sa bulan sang Nobyembre.
Sa interview sang Bombo Radyo Bacolod kay Engr Leomel Tambanillo, assistant Vice President for planning and business operation sang Negros Power, ang P0.94 nga pagsaka sa electric rate ang tuga sang generation charges, system loss charges, kag pagsaka sang value-added tax sa generation.
Paathag sini nga P1.77 ang ginsaka sa presyo sang Wholesale Electricity Spot Market.
Kadungan sa pagsaylo sa Negros Power sang billing, ang rate nga P11.07 sang Oktubre ang magasaka sa P12.01.
Panindugan sini nga wala nagbag-o ang rate sang Negros Power santo sa Certificate of Public Convenience and Necessity (CPCN) kag nagsaka lamang ang presyo bangod sa pagsaka sang rate gikan sa WESM kag additional charges.
Suno diri, ang pagsaka sa rate sang kuryente ang naga-apekto sa tanan nga power distributor sa Visayas Grid.
Apisar sa pagsaka, aminado si Tambanillo nga gamay ang ginsaka sang Negros Power kun ipaanggid sa Northern Negros Electric Cooperative (NONECO) kag Negros Occidental Electric Cooperative (NOCECO).
