Nagpanawagan ang secretary general sang General Alliance Workers Association (GAWA) sa gobyerno nga tun-an ang rason sa padayon nga pagsaka sang presyo sang bugas.
Sa interview sang Bombo Radyo Bacolod kay Wennie Sancho, wala ini nagasalig gid sa plano sang gobyerno nga pagbutang sang Suggested Retail Price sa presyo sang bugas.
Suno diri, madugay na nga napromisa ang manubo nga presyo sang bugas apang tubtob sa karun nagasaka man ang balor sini.
Para kay Sancho, ang problema diri amo nga wala ini gintun-an sang gobyerno.
Dugang pa sini, dapat hatagan sang prayoridad ang food security sa pungsod nga amo ang nagapanguna nga kinahanglanon sang Pilipino.
Pahayag ni Sancho, ang gobyerno matahum kun magplano sang ila mga proyekto apang indi man sini matuman.
Samtang, panawagan naman ni House Deputy Minority Leader France Castro, amo suportahan ang lokal nga produksyon sang mga mangunguma.
Sa interview sang Bombo Radyo kay ACT Partylist Rep. France Castro, pagabantayan kun mangin epektibo ang pagbutang sang SRP apang nagpanawagan ini nga iprayoridad ang pagbakal sa mga mangunguma kag indi magsalig sa importasyon.
Suno diri, dapat man nga seryusuhon ang pagpangita kag pag-aresto sa mga smugglers kag hoarders nga naga-apekto sa presyo sang bugas.
