Naglupok nga lightning arrester kag naguba nga transformer ang gintunaan sang power outage nga nagluntad sa tatlo ka Local Government Units sa probinsya sang Negros Occidental.
Suno sa operations manager sang Northern Negros Electric Cooperative nga si Atty. John Deles, bisan sila sa electric cooperative indi kumporme sa power outage bangud sila ang apektado man kag sila mismo ang nalakip man sa member consumer sang electric cooperative.
Suno kay Deles, sang Agosto 28, alas 11:00 ang takna sa gab-i, nagtrip off ang 15 MBA substation gani ang sub station officer-in-charge nagpahibalo gilayon sa mga duty engineers sang NONECO kun sa diin ginstekyar ang substation.
Suno diri, nakita sang mga engineers nga naglupok ang lightning arrester kag bangudsa power surge naigo ang power transformer rason nga naguba ini nga gintunaan sang brownout.
Gilayon man ginkay-o sang mga engineers kun sa diin nagbalik ang electric power.
Apang liwat nga nagtrip sang Martes kag wala na nakabalik ang supply sang kuryente sa banwa sang Manapla, EB Magalona kag syudad sang Victorias sa sulod sang pila ka adlaw.
Nagrekomendar ang mga engineers sang NONECO nga islan ang transformer bangud problema na ini ukon kay-uhon apang maagi man ini sa gihapon sa bidding kun kay-uhon santo sa Energy Regulatory Commission.
Bangud madamo pa sang proseso nga kinahanglan agyan agud makabakal sang bag-o nga transformer, nagkig-angot ang mga ini sa malapit nga electric cooperatives agud nga masolusyunan ang ginapangatubang nga problema.
Sa ulihi nadesisyunan naman sang NONECO nga hulamon ang reserba nga transformer sang CENECO paagi man sa pagpatigayon ni Victorias City Mayor Javi Benitez kag ni Bacolod City Mayor Alfredo Benitez.
Una nagconnect sila temporaryo sa substation sang CENECO sa Silay City tubtob nga nakahulam sang reserba nga transformer sa nasambit nga electric cooperative.
Aminado man ini nga ang kooperatiba ang indi perpekto apang ginatinguhaan sang mga ini nga mahatagan sang maayo nga serbisyo ang mga kunsimidor sang NONECO.
Sa pihak nga bahin, wala man sang plano ang NONECO nga magsulod sa Joint Venture Agreement bangud masarangan sang kooperatiba ang operasyon kag sang damlag lang ini ang gin-awardan sang tripple A electric cooperative award.
