Ginpangkumpiskar sang Regional Civil Security Unit 6 (RCSU6) ang pila sa mga armas-luthang sang security personnel nga nagabantay sa gina-agawan nga propidad sa Hacienda San Antonio Dos, Barangay Dos Hermanas, Talisay City, Negros Occidental.
Madumduman nga ang RCSU 6 ang nagpatigayon sang imbestigasyon kasunod sang nakuhaan sang video nga lalaki nga nanaya kag nagpalupok sang armas-luthang sa mga Comprehensive Agrarian Reform Program (CARP) Beneficiaries.
Ang suspect nga si Jose Aluntaga Jr, Alyas Jojo ukon Alyas Cesar Castro, 68 anyos, ang ginpasakaan sang kaso nga grave threat, illegal discharge of firearms kag Republic Act (RA) 10591 ukon Comprehensive Firearms and Ammunition Regulation Act.
Una naman nga ginpanginwala sang security agency nga ila tinawo si Aluntaga, apang maathag sa video nga siya ang kaupod sang mga security personnel.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, sila ang nakarecover sang panibag-o nga mga videos may kaangtanan sa lugar, bangod padayun gihapon ang mga kinagamo.
Ini ang ginatsekyar pa, bangod mahimo nga mga daan na nga videos kag ginarepost lamang.
Ang mga security personnel sa lugar ang ginapaproseso man sang RCSU 6 sang exemption sa Election Gun Ban.
Ginpahayag sini nga may pila ka mga armas-luthang nga ginkumpiskar ang RCSU 6 gikan sa security personnel, apang wala sila makabatun sang detalye sini.
Samtang nagbuhin man ang ang security agency sang personnel nga ginapabantay sa ginaagawan nga duta.
