Responsibilidad sang Bacolod Gugma Foundation nga maglibot kag maseguro nga reasonable ang presyuhanay sa mga kiosk sa mga festival sites sang Masskara Festival 2026.
Sa interview sang Bombo Radyo Bacolod kay Bacolod City Councilor Jason Villarosa, chairperson sa Committee on Tourism sa Sangguniang Panlungsod, humalin sang nagbalik ang Masskara celebration kasunod sang COVID-19 pandemic, wala na sila nagpatuman sang price ceiling sa mga food kiosk.
Ini agud mahatagan sang ligwa ang mga vendor sa pagpresyo sang ila nga mga baligya, apang indi man dapat nga mag-abusar.
Suno kay Villarosa, wala sang personal nga nagreklamo sa ila, apang nakalab-ot na sa iya opisina ang mga facebook posting angot sa reklamo.
Ini bangod sa mga reklamo sa presyo sang mga pagkaon, partikular na ang beer nga nagadangat sa balor nga P200 pasaka.
Pangabay sini sa mga food kiosk nga magbaligya sa resonable nga presyo kag indi na hulaton nga magpatuman pa sang price ceiling.
Pahayag ni Villarosa nga sa ila memorandum of agreement, may-ara sang kasugtanan nga ang Bacolod Gugma Foundation ang may iga-assign nga personnel nga magalibot sa mga koisk agud maseguro ang fair pricing, kasubong man ang sanitation.
Suno diri, kadungan sa pagproseso sang mga special permits para sa mga magabaligya sa Lacson Tourism Strip, ang Bacolod Gugma Foundation ang nagrequest sang 10 tubtob 15 nga adisyunal nga special permit para sa ambulant vendors sa Bacolod City Public Plaza.
