Nagapati ang political analyst nga dako ang epekto sang rebelasyon sang mga nagapakilala nga ex-Marines sa ‘confirmation of charges’ hearing ni former President Rodrigo Duterte sa International Criminal Court.
Sa interview sang Bombo Radyo Bacolod kay Atty Jomax Ortiz, pasabog ang mga ginbuy-an nga rebelasyon, ilabi na kun ini ang mapamatud-an.
Ginalantaw sang abogado nga indi magpasaga-saga sa pagpagwa sang pahayag ang 18 ka alleged ex-Marines kun wala sang kamatuoran.
Apisar nga indi pa matuod nga anay Marines ang apat sa mga nagtu-ad, ang importante suno kay Ortiz amo ang kamatuoran sang ila mga alegasyon angot sa mali-maleta nga kwarta nga ginadul-ong sa mga opisyales sang karun nga administrasyon partikular na sa delivery sa balay nanday President Ferdinand “Bongbong” Marcos Jr kag former House Speaker Martin Romualdez.
Suno kay Ortiz, nagpahayag na si Atty Levito Baligod nga ipadala sini ang affidavit sa ICC.
Gani balantayan kun malakip ini sa mangin depensa ni Atty Nicholas Kaufman, legal counsel ni former President Duterte.
Paathag ni Ortiz nga indi basta-basta nga abogado si Atty Baligod bangod ini man sadto ang nagfile sang kaso angot sa Priority Development Assistance Fund (PDAF) scam.
Nagapati ang political analyst nga bisan magfile sang cyberlibel complaints si former senator Antonio Trillanes IV, sarang lamang mahambal ni Atty Baligod nga ang iya pahayag ang nakabase lamang sa statements sang ex-Marines nga may-ara sang affidavit ukon nakatake sang oath.
Nagapati si Ortiz nga dako ang epekto sa ICC hearing sang rebelasyon nga si Trillanes ang nagfacilitate sang ICC investigators sang 2023, kag alegasyon nga ang mga ini ang ginhatagan sang $2 million.
Paagi sini, magagwa nga bias ang imbestigasyon bangod nagbatun sang suhol ang ICC investigators gikan sa prosekusyon.
