Nagapati ang political analyst nga ang recantation sang apat sa 18 ka mga nagapakilala nga ex-bodyguards kag bagmen ni former Representative Zaldy Co ang kabahin na sa tikang sang administrasyon agud indi maglab-ot kay former House Speaker Martin Romualdez kag President Ferdinand Marcos Jr. ang imbestigasyon sa flood control anomalies.
Sa interview sang Bombo Radyo Bacolod kay Atty Jomax Ortiz, kun magpadayun ang imbestigasyon, indi gid malikawan nga magwa ang pangalan nanday Romualdez kag Marcos.
Nagapati ini nga may ara sang political operator sa Malacañang nga amo ang nagadihon sang game plan agud masalbar ang Presidente sa issue.
Bangod sa karun, ang 18 ex-bodyguards amo ang makabig nga baraha sang kampo sang Duterte gani ini ang ila nga ginatay-og.
Suno kay Ortiz, sa pagrecant sang apat sa mga ini, kag sa alegasyon nga sila ang ginbayaran para magtestigo angot sa deliveries sang male-maleta nga kwarta kanday Romualdez kag Marcos, ang magabutang naman sa kwestyon sa kredibilidad ni Atty Levito Baligod.
Kasubong man ang kredibilidad ni former Congressman Mike Defensor kag Senator Rodante Marcoleta nga amo ang nagpresentar sa 18-ex bodyguards.
Dugang pa ni Ortiz nga ang recantation sang 4 ka ex-bodyguards ang makaapekto man sa mga statement sang nabilin nga 14 ka ex-bodyguards, kag balantayan pa ang dako nga posibilidad nga madamo sang maga-upod sa apat.
Pahayag sini nga makita sa karun nga halos ang tanan ang nagapabor sa Marcos Administration kalakip na ang pagbasura sang Korte Suprema sa petisyon batok sa House Impeachment proceedings.
Suno kay Ortiz, mahimo nga game plan man sang Marcos administration ang indi pagpabalik sa Pilipinas kay Zaldy Co, agud indi na sini ma-implikar si Romualdez kag Marcos.
Nagapati ini nga matapos lamang ang 2028 National Elections, indi gid makabalik sa Pilipinas si Zaldy Co.
