Kaangay sang target sang general headquarters sang Philippine National Police, target man sang Bacolod City Police Office nga mapunggan ang dalagko nga insidente kadungan sang paghiwat sang eleksyon sa Mayo 9.
Suno kay Police Lt. Col. Lester Leada, deputy city director sang operations sang BCPO, wala sang election-related violence nga narekord sa Bacolod sang tinalikdan nga eleksyon indi kaangay sa iban nga mga lugar.
Suno kay Leada, ginatinguhaan sang BCPO nga mapabilin ang record nga zero violent incidents.
Nagahingyo man si Leada sa mga kandidato nga hingyuon ang ila mga supporters nga ipabilin nga malinong ang pagpangampanya para sa ila agud wala sang untoward incidents nga marekord sa piniliay.
Kun malinong ang Bacolod suno kay Leada, dako ini nga bulig para sa BCPO bangud mabutang naman sa limelight ang BCPO kun magsaka ang classification sang ciudad.
