Ginalauman nga mapatuman sa masunod nga tuig ang mga ginpropose nga proyekto para sa recovery sang mga biktima sang paglupok sang bulkan Kanlaon.
Sa interview sang Bombo Radyo Bacolod kay Donato Sermeno, regional director sang Office of Civil Defense-Negros Island Region, sang Setyembre 15 kag 16 may ginpatigayon nga workshop para sa mga Local Government Units nga naapektogan sang paglupok sang bulkan Kanlaon kaupod ang natinal agencies nga katapo sang National Task Force Kanlaon.
Suno diri, yara sa pagtililipon ang LGU sang banwa sang La Castellana, Murcia, kag ciudad sang La Carlota, Bago, San Carlos kag Canlaon.
Didto gindihon ang mga proyekto kag aktibidades para sa recovery kag development sang mga area nga naapektohan sang paglupok sang bulkan.
Samtang, nagpabutyag naman ang national agencies sang bulig para sa pondo sang mga proyekto.
Ang mga proposed projects natunga sa lima ka sektor, nga amo ang Infrastructure, relocation, livelihood and business, governance kag social services.
Pahayag ni Sermeno, ginalauman nga sa tuig 2026 maumpisahan na ang pag-implementar sang mga proyekto kag mahimo nga sa tuig 2035 matapos ang tanan bangod indi mahapos ang pagdevelop sang saylohan sang mga biktima sang paglupok sang bulkan, halin sa pagkay-o sang dalan, pagbutang sang kuryente kag tubig tubtob sa pagtukod sang mag buluthuan.
