Naplastar na ang recovery plan para sa Canlaon City, Negros Oriental matapos ang kahalitan nga gintuga sang Bagyo Tino.
Madumduman nga halos maagyan ang mayor nga dalan sang nasambit nga ciudad bangud sa mga dalagko nga bato kasunod sang nagluntad nga rock slide.
Sa interview sang Bombo Radyo Bacolod kay Negros Oriental Governor Manuel Chaco Sagarvarria, mas maayo na ang sitwasyon sang Canlaon City sa karun bangud kun madumduman nga tuman ang halit nga gintuga sang Bagyo Tino sa nasambit nga ciudad.
Suno sa kay Sagarbarria sa adlaw nga nagluntad ang kalamidad ang provincial government sang Negros Oriental nagpadala sang mga heavy equipments agud nga mahawanan gilayon ang national road nga natabunan sang bolders ukon tuman ka dalagko nga bato.
Ang mga heavy equipments ang ginlakipan sang apat ka backhoe, gradiers, water tunkers kag water filtration trucks.
Suno kay Sagarbarria bangud sa nautod nga taytay bangud sa mabaskog nga daludo sang tubig nasupnan ang ginaagyan sang tubig gani naglikaw ini padulong sa national road.
Ang tanan nga tubig ang nagkadto sa dalan nga may dala nga bato nga daw kaangay sang salakyan ang kadakuon.
Ginhingagaw nila pahawanan ang dalan agud nga may agyan ang magapadala sang bulig para sa mga biktima sang kalamidad.
20 man ka tawo ang nadulaan sang kabuhi bangud sa kalamidad.
Amat amat na nga nagabalik sa normal ang sitwasyon sa ciudad.
Apang aminado si Sagarbarria nga kinahanglan sang isa ka tuig para sa full recovery sang nasambit nga ciudad.
Isa sa ginatinguhaan nga mabalik sang Canlaon City amo ang pagrecover sa pagpananum sang high value crops nga ginasupply sa Negros Occidental kag Bacolod City.
Bangud sa Bagyo Tino ginabanta magadangat sa P5 million ang balor sang kahalitan sa Agrikultura.
